Petri Andreae Matthioli Commentarii in libros sex Pedacii Dioscoridis de materia medica 1554


	157 - Aiuga

Si raccomanda l'opzione visualizza -> carattere -> medio del navigatore
The navigator's option display -> character -> medium is recommended

utuntur, bibentes decoctum. Ad antedicta illinitur, cum polenta iure decocti subacta. Trita farinam, et cum fico in pilulis sumpta, alvum emollit: excepta melle, cum aeris squama, et resina deiicit: apposita ex melle, vulvae vitia extrahit: mammarum duritias discutit, vulnera glutinat: ulcera quae serpunt, cum melle illita, cohibet. Alterum est genus aiugae, cubitalibus ramis, in anchorae speciem incurvatis, praetenuibus: coma supradictae, flore candido, semine nigro. haec etiam pinum redolet. Tertia mas nominatur, parvula, foliis exilibus, albis, scabris: caule aspero, candido: luteis flosculis, semine iuxta alas. resipit et haec pinum. Hae duae vim superioris obtinent, sed non usqueadeo efficacem.

[Aiugae consideratio.] AIUGAM, quam Graeci Chamaepityn vocant, quoniam foliis, et odore pinum refert, herbariorum vulgus Iuam(?) arthriticam appellant, quod ischiadicis, et aliis articulorum doloribus opem ferat non obscuram. Vulgaris est notitiae Aiuga, quae primo generi ascribitur. Verum postrema, quam saepius etiam vidimus, non adeo omnibus est nota. quemadmodum nec media, quam hactenus mihi quidem videre non licuit. [Cuiusdam Germani error.] Caeterum in aperto errore versabatur Germanus ille pharmacopola, qui Brasavolum docuit Aiugam Germanica lingua vocari Vergiss mein nicht. Quandoquidem herba huius nominis mihi cum Germanis iandiu versanti notissima est: quae tamen nulla prorsus ex parte quamvis Aiugam repraesentat. [Chamaepityos vires ex Galeno.] Chamaepityos meminit Galenus libro VIII. simplicium medicamentorum, ubi de eius viribus ita scriptum reliquit. Chamaepitys gustu quidem amarum saporem acri validiorem obtinet. Effectu vero expurgat, abstergitque viscera plus quam calfacit. Proinde regio morbo laborantibus, et omnino quibus facile iecur obstruitur, bonum est medicamentum. Sunt autem qui etiam eam exhibent decoctam in melicrato iis, qui coxendicis doloribus torquentur. Herba porro ipsa viridis vulnera magna conglutinat, et ulcera putrescentia sanat. Praeterea mammarum durities discutit. Est enim in siccando ordinis tertii, in calfaciendo vero secundi.


	157 - Aiuga