Conradi Gesneri

Historiae animalium liber III qui est de Avium natura - 1555

trascrizione di Fernando Civardi - transcribed by Fernando Civardi

	29 - de Avosetta

Si raccomanda l'opzione visualizza ->  carattere ->  medio del navigatore
The navigator's option display ->  character ->  medium is recommended

[GO] = gotico - [GR] = greco - [HE] = ebraico

DE AVOSETTA.

AVIS haec, cuius iconem in sequenti pagina damus, apud Italos Ferrariae avosetta (ni fallor) nominatur, nescio qua ratione: et a rostri sursum inflexi figura beccostorta et beccoroella. Lucarni circa lacum Verbanum spinzago d’aqua: nam et arquata avis iam supra nobis descripta spinzago simpliciter eis nominatur. haec vero aquatica est, et palmipes. Turcis zeluk. Germanicum nomen nondum discere potui: quanquam apud nos etiam interdum capiatur, sed rarissime. Ea quam Ferrariae vidi crura habebat dodrantalia, rostrum nigrum et sursum tendens in extremo acutum, quinque digitorum fere longitudine pedes colore cyaneo diluto, digitos membranis iunctos. corpus supinum totum album erat, pronum ex albo nigroque alternis distinguebatur. caput et cervix superius ex fusco nigricabant. magnitudo totius corporis fere columbae aut paulo gracilior. longitudo ab extremo rostro ad extremam caudam dodrantes duo.

Figura haec est Avosettae, cuius descriptionem praecedens pagina continet.

DE AURIVITTI.

AURIVITTIS (ut Gaza vertit ex Aristotele, pro Graeca voce [GR]. quidam codices perperam habent [GR]) in spinis victitat, vermen et quodvis aliud animal aspernatur. dormit et pascitur eodem in loco, ut et caeterae quae spinam appetunt, nempe spinus et carduelis, (thraupis,) Aristoteles. Guil. Turnerus avem carduelem vulgo dictam interpretatur, Germanis [GO] vel [GO]. Aurivittis (inquit) una est ex aviculis, quae carduorum semine victitant, et vermes etiam oblatos non attingunt. Alii goldfincam aut distelfincam, spinum: alii carduelem esse volunt. Sed si quis ex spinivoris praeter hanc aliam aurea vitta redimitam ostenderit, cui magis aurivittis nomen competat, quam huic, opinionem meam facile patiar explodi; alioqui non video, quin digna sit quae

probetur, Haec Turnerus. Eberus vero et Peucerus aurivittem aliam avem faciunt, quae Germanice dicatur [GO], (Helvetiis [GO]:) vertice tota nigra ima parte punicea, superiore cinerea nigricans. Sed de hac plura dicemus in elemento R. inter eas quibus nomen a colore rubro factum est vulgo.

	29 - de Avosetta