Conradi Gesneri

Historiae animalium liber III qui est de Avium natura - 1555

trascrizione di Fernando Civardi - transcribed by Fernando Civardi

	63 - de Gallina Indica - de Gallinis lanigeris

Si raccomanda l'opzione visualizza ->  carattere ->  medio del navigatore
The navigator's option display ->  character ->  medium is recommended

[GO] = gotico - [GR] = greco - [HE] = ebraico

DE GALLINA INDICA.

indica Gallina, quam Philippus Traiectensium episcopus in deliciis habuit, cristata plane fuit, (crista speciosa ornata,) perque omnia gallinae similis, si colorem, quo psittaci in morem virebat, excipias. Eam quanquam vivam non viderim, exuviae tamen, quae Batavoduri in arce custodiebantur, indicant gallinacei generis avem, Gyb. Longolius. Quaerendum hic sit attagen Sylvatici, quem scribit pennis vario modo coloratis esse sicut gallina Indica, interdum tamen colore viridi et coelesti inveniri. Pavones Indi (Gallopavi) pulchritudine multum nostro pavone inferiores sunt, sed caudam suam similiter mirantur in orbem conversam. at contra gallinae quas ego vidi Indicae, nostris pulchriores sunt, pennisque pavonis decorantur: sed cauda ampla carent, quam nec in orbem erigunt. igitur non a coloribus, sed operationibus ipsis species animalium sunt distinguendae, Cardanus.
idem alterius etiam gallinae Indicae meminit hisce verbis: Gallina Indiae occidentalis, imo potius vulturis genus (nam cadavera et res corruptas sectatur) bene olet ob caloris vehementiam, et siccitatem temperiei.

DE GALLINIS LANIGERIS.

Icon haec desumpta est ex charta quadam Cosmographica.

fuch civitas est maxima versus Orientem, in qua maximi galli nascuntur. Gallinae sunt albae instar nivis, non pennis sed lanis tectae ut pecus, Odoricus de Foro Iulii. In civitate Quelinfu, in regno Mangi nomine, inveniuntur gallinae, quae loco pennarum pilos habent, ut catti, nigri scilicet coloris, sed ova pariunt optima, M. Paulus Venetus 2. 68.

	63 - de Gallina Indica - de Gallinis lanigeris